বিরহের মাস
কবি শাহারা খান
তুমি না আইলে না আইও,
আর বার চাইতাম নায়।
তোমার পথে চাইয়া চাইয়া,
করতামনা আর হায় হায়।
বৈশাখ জৈষ্ঠ্যর গরম গেলো,
তুমি আইলায় না।
আঢ় মাইয়া বাদলির দিনো,
একবার কান্দাত বইলায় না।
বারিষা মাইয়া পানিয়ে,
গাঁও নিলো’গি ভাসাইয়া।
একবার গেলামনা বাফর বাড়ি,
তোমার লগে নাও চড়িয়া।
আগন মাইয়া দিন আইলে,
নয়া চাউলর পিঠা হকলর ঘরে।
তোমার কথা মনো অইলে,
আমার চউখর পানি ঝরে।
মাঘ মাইয়া শীতর লাগি,
তইছলাম সেলাই করি কাঁথা।
তুমি আইলে উড়লায় অনে,
ভুললাম অনে হকল বেথা।
বসন্তে কোকিলের ডাকে,
উদাসী মনে কিতা কিতা করে।
আমার সুয়ামী আমারে তইয়া,
কেমনে রইলা বিদেশ পড়ে।
কদুর চারা তইছলাম রুইয়া,
তুমি আইলে খাইবায়।
গাছর কদু বুড়া অইলো,
হায়গো তোমার অপেক্ষায়।
তুমি ছাড়া কেমনে কাটাইয়ার,
আমার বিরহের বারোমাস।
একবার তুমি খবর নিলায়না,
বুঝলায় না আমার দীর্ঘশ্বাস।
২৮/০৯/২১
Advertisement